صينية دياي مع خبز النخاله

هالأكلة ماعرفت شسميها بصراحه ..!
برمضان كنت محتارة شسوي وكنت زعلانه جان اخترع هالأكله لول

المقادير
 

2 فص ثوم

قفشة متوسطة زيت زيتون

قفشة متوسطة ملح

ذرة

فلفل بارد أخضر 

فلفل أحمر متبل

دياي 3-2 بدون يلد وعظم

بصل 

كريمة حمرا

موزريلا

خبز همبوقر بالنخاله 

بهارات وتفضل تكون بهارات إيطالية

الطريقة

تفوحون الدياي لين يستوي بعدها تخلونا لين تبرد وبعدها تسوونها مثل الشورما ، وأكبر غلط إذا اشتغلتوا بالدياي واهي حاره لأنها راح تكون بالمضغ مو ترفه ..!

 

تقطع الثوم وفلفل بارد البصل قطع صغيره ، وماكثر وايد من البصل والفلفل يعني فلفل واحد ونص بصله ، ونضيف بعد هالفلفل المتبل وتلقونه بمركز سلطان وهاذي صورته حده عجيب

طبعاً نحط هالمقادير بماعون ونضيف معاه الزيت زيتون والملح والذرة والبهرات نخلطهم مع بعض

ناخذ البايريكس ونغطيه بخبز النخاله

بعدين نضيف عليه الخلطة

ونغطيه بالخبز

بعدها نصب فوقه الكريمة ونكون من قبل مسخنينها وضايفين معاها اشوية موزريللا

ونحطه بالفرن تقريبا ربع - نص ساعه 

وهني وعافيه 

شوكليت مافن

صباح الخير

مع ان هالمدونة غبرت شوي لول لاني هاملتها فقررت انظف الغبار وانزل لكم هالحلو اللذيذ 

ضغطوا عالصورة

هالكيكة سهلة ومايبيلها فن وشطارة ممكن اي وحده تبي تتدرب عالطبخ تبدي بهالاكله

المقادير

ماي 

زيت زيتون

بيض

كيكة مافن 

شوكليت للتزيين 

في بنات وايد مالقوا الكيكة والشوكليت .. اسهل عليكم راح تلقونها بمركز سلطان 

الطريقة

حسب الخطوات اللي مكتوبة بغلاف الكيكة نحط بودرة الكيكة مع ماي وزيت زيتون والبيض

( طبعاً المقادير بالظبط مذكوره بالغلاف ) 

نخلطهم ومو شرط حتن بالخلاطة الكهربائية ممكن بإيدينكم لأنها بسرعة تتجانس

بقالب الكيك ندهنه بشوي زيت زيتون

( في ناس تدهنه بزبدة وطحين )

بعدها نحط الخلطه بالفرن على درجة حرارة مابين 150-200 لمدة تترواح مابين ساعة - ساعة إلا ربع
لمن تجهز الكيكة نذوّب الشوكليت ( نص العلبة) ونصبه فوق الكيكة لمن تاخذ درجة حرارة الغرفة نحطه بالفريزر شي ساعه وبعدين ممكن تحطونها بالثلاجة

وعليكم ألف عافية 

؛*

pizza pizza !

مساكم الله بالخير

شلونكم مع الرمضان ان شاء الله تعودتوا عليه :)

سويت من قبل فتره بيتزا

 

المقادير

فلفل بارد

مشروم

بصل

بهارات

زيت زيتون

ثوم

زيتون اسود

نقانق - مرتديلا

معجون طماط

عجينة البيتزا

موتزريلا مبشوره

الطريقة

نحمس المشروم مع ثوم مقطع قطع صغيرة مع اضافة زيت زيتون مو وايد شوي ونخليه لين نحس ان المشروم خذا نكهة الثوم

بالنسبة لصلصة الطماط نسخن معجون طماط - انا استخدمت كي دي دي علبة وحده - مع زيت زيتون واضيف شوية بهارات مع شوية بصل مقطع قطع صغيرة - يعني قفشة صغيرة -  لين نحس ان الصلصلة تسخنت 

  

الحين دور عجينة البيتزا .. انا ناسية الماركة اللي اشتريها بالجمعية وايد زينة لدرجة ان ماله داعي تفردون العجينة وتقطعونها او حتن تضيفون طحينة عليها  ومناسبة للوحده اللي ماعندها وقت تسوي عجينة او ماعندها احد يساعدها فعشان جذية استخدمتها وعلى فكرة طعمها حده لذيذ وهذا اهم شي :)

بالفرشة نغطي صينية الفرن بشوي زيت زيتون عشان ما تحترق قاعدة البيتزا ونحط البيتزا بعد ما ضفنا صلصة الطماط مع المشروم و النقانق و المرتديلا و الفلفل و البصل والزيتون والموتزريلا ونحطه بالفرن عادة ما تاخذ اكثر من عشر دقايق

..

 

لمن خلصت من البيتزا بقى شوي من مقاديرها فشسويت ان بنفس الجدر اللي حمست فيه المشروم - عشان فيه نكهة الثوم و الحميسة - حطيت كل المقادير - ماعدا الموتزريلا و الزيتون 

وضفت شوي زيت زيتون مع شوي بهارات وخليته على نار متوسطة

 وقدمتها على السفرة

وبجذية سويت طبقين بنفس المقادير 

وبالعافية للي راح يسويها 

؛)  

في شغلة احب اقولها

النت عندي حده بطئ فاعتذر للي يرد علي اهنيه او بمدونتي الثانية وان شاء الله يرد النت لوضعه الطبيعي

 

chocolate yum yumy !

مساء الخير

أمس سويت هالشوكليت حده لذيذ بس دسم :)

المقادير

كيكة ككاو

chocolate syrup

فليك - كتكات - اوريو

3 كيري

حليب 250مل

2دريم ويب

قيمر1

تكفي لست أشخاص

الطريقة

نخلط القيمر و الكيري و الحليب مع دريم ويب بالخلاط ونستمر بالخفق لين تصير متماسكة بعدها نحدطها بالفريزر

بالنسبة للكيك في ناس نستخدم الكيكة الجاهزة بس يفضل تسوون الكيكة وبعد ما تبرد نقطعها شرايح

بالقلاص نحط الصوص شوكليت بقاعدته ودار مداره بعدها نحط قطعة من الكيك ومن بعدها نحط طبقة من الكريمة بعدها نحط صوص شوكليت

الطبقة اللي بعدها تكون عبارة عن مكس الكريمة مع وحده من اي من ( فليك او اوريو او كتكات ) طبعاً يكون مقطعينهم قطع صغار بعد ما نخلطه نحطه كطبقة اخيرة وبعدها نحط اخر شي نوع الككاو اللي استخدمناه

نحطها بالفريزر ساعة - ساعتين بعدها نحطها بالثلاجة

وصحة وعافية

:)

صاج فاهيتا دياي

مساكم الله بالخير :)

السموحة  عالتأخير..ِ

أمس سويت هالطبق

 المقادير

خبز صاج 4

دياي من دون يلد وعظم 4

مشروم

بصل 2

قفشة ملح 1

كوسه - لول بعدين اقولكم ليش!

فلفل بارد - بكل الوانه

ميونيز- حسب ارغبة

بهارات خاصة لتبيلة فاهيتا

فص ثوم4

زيت الزيتون

الطبق يكفي لست أشخاص

الطريقة

نقطع الدياي بحيث يكون الصدر متوسط السماكة يفضل نسوي فتحات في  الدياي عشان لمن نتبلها تاخذ نكهة التتبيلة ؛) و بعدها نملّحها ونضيف زيت الزتون عليها و نسوي لها مساج لول عشان بالشوي ما تلتصق  

نخليه على كتر جذي ربع نص ساعة

بعدها نشويها

وبوقت الشوي نكون نسخن الثوم - مقطع صغار - مع شوي زيت زيتون مع المشروم وشوية بصل لمدة ربع ساعة على نار متوسطة لان المشروم ياخذ وقت لان ابيه يكون شوي متحمش بعدها نضيف الفلفل البارد و البصل المتبقي مع الكوسة ونقلب  لين نحس ان خذوا نكهة الثوم و لانوا يعني تاخذ منكم نص ساعة 

بعدها ستيك الدياي بعد ما نخليه على كتر عشر دقايق نقطعها شرايح و نضيفها على الخضرة

وبعدها نفرد الصاج ونحط شوي ميونيز و نحشيها بفاهيتا الدياي ونقطعها على شكل رول

النتيجة

وهذا الاهم لول اولا ماكانت المقادير متوفرة عندي كلها يعني الفلفل بارد بألوانه ما حصلت فضفت الكوسة لاني احبها بس ما اثر عالطعم كلش بس الافضل لو ضفت مخلل.. ناس يحطونها ويقولون تطلع ألذ

الشغلة الثانية اللي خلت الاكلة عاااادية جدا ان التتبيلة الجاهزة ماعجبتني ماحسيت بطعم التوابل بالمرة !

كان من الافضل ان اسخن الاكلة لمن لفيتها بالصاج لو على الشواية كان من الممكن تكون ألذ

عموما في منهم عجبهم ومنهم ما عجبهم بس تظل هاذي تجربتي الاولى لهالطبق فأعتبر كأول تجربة زينة عندي

وسلامكتم

:)

احم احم

مساكم الله بالخير

:)

شلونكم ان شاء الله بخير ومبارك عليكم الشهر الفضيل راح يكون باجر أول أيامه عسى ربي يسهل علينا صيامه و يتقبل دعوتنا

ممم من وين ابتدي :)

من اسم المدونة ما يحتاي عرفتوا عن شنو راح تتكلم .. كل شي عن الاكل و خاصة بالطبخات اللي راح اطبخها ويمكن راح اتكلم عن شغلات تخص بالرشاقة لأني كنت متينة  فأحب أفيد غيري بتجاربي بالرجيم و الاكلات و النظام الغذائي وغيره العموم  لاحقين عالشغلات الاخيره باجر الرمضان منو بيسوي رجيم انا اولهم بمتن لول

انا تعلمت الطباخ من برامج الطبخ يعني محد قعد علمني خطوة بخطوة فـ من هالمدونة ابي افيدكم وتفيدوني .. تطلع الطبخة

ناجحة فاشلة مو مهم المهم أصير شيف و افتح لي مطعم واقدم استقالتي لول مو احسن

؛)

مابي اطول عليكم أحب اشكر الكل اللي شجعني على فكرة اسوي مدونة  وبالذات ريومه كل الشكر لها على هالديكور الحلو كتير كتير لول خلاص صرتي مصممتي الرسمية لأن هذا ثاني مدونة تصمم لي اياه وكل واحد فيهم أحلى من الثاني

مشكوره يا عمري

مّممممووووه !

وباجر راح أسوي لكم أكله إنما إيه

زوروني باجر يمكن انتقص لكم حق الفطور

لول 

مع السلامة